كيف تعرف من هم أصحابك

كيف تقيم أصحابك ؟

كيف تعرف إذا صديقك كفو ولا خرطي ؟

كيف تعرف إذا هو كريم, شهم, قد الكلام, يفي بوعوده وغيرها من الصفات اللي نعرفها عن البشر!

حقيقة انا اضطريت اتعلم هالشي من بعد تجربة خائسة«كيف خائسة بس 😀 ؟

عندنا أصحاب كثيرين, بعضهم يصعب علينا تقييمهم من باب الميانة اللي بيننا.
أقصد بهالشي, تربينا مع بعضهم من الصغر, ف مانشوف إلا الشغلات اللي يسوونها قدامنا أو تعاملهم معنا.
وصعب إننا نحكم على أصدقائنا او نقيمهم من خلال تعاملهم معنا, بتقولون لي ليش, وانا راح اقول لكم ليش لان هذا سبب المقالة بقوله سواء سألتوا ولا ماسألتوا ولا بيطلع ماعندي سالفة.

طبعاً صعب إنك تقيم أدب وأخلاق زميلك في تعامله معاك, الظروف تختلف من صداقة لصداقة لكن صديقك اللي يمون عليك ولو كنت إنت إنسان مثلي, السب والسلتحة في بعض هذا شي عادي ومفروغ منه, يشرشح سلسفيل أهلك وهو يضحك وانت تفطس ضحك ولا بالخاطر شي.
ومن الأمور الأخرى, هل الرجال يفزع ولا مايفزع, وقفتوا عند بقالة وطلبتوا ثنين فلافل وثلاثة عطر شانيل وطلع الحساب 10 ريال وحلف عليك إلا إنه يحاسب وانت أصلا ماعندك إلا اربعة ريال يعني حتى ماتكمل خمسة.
هذا شي عادي جداً ولا يدل إنه كريم فزيع أو أي شي, لانه غصب عليه ابن اللذينا يحاسب عنك تكفيراً للسب والشرشحة اللي صارت فوق, أو لانك انت بتردها له بطريقة او بأخرى وهذي قيمة الصداقة اصلاً.

طيب, يمكن ماتتضح الصورة الحين لكن لو تخشون معاي بالصاروخ هذا وتفهمون قصدي بالتحشيشة التالية تتضح الصورة وتصبح العصافير تغرد فوق روسكم مباشرة, حتى لو حششتوا مضبوط, يمكن العصافير تنظف روسكم وتاكل القمل اللي فيه.

كيف ممكن تقيم صديقك طيب؟

من خلال معاملته للآخرين

كيف يتكلم مع الناس الآخرين اللي خارج حدود صداقاته, الغرباء اللي مايعرفهم.
لو صادف ولقيتوا واحد بالشارع ماتعرفونه ولا يعرفكم وصار بينكم موقف, كيف خويك يتعامل بهالموقف؟ سواء كان الشخص الثاني هذا , أنثى, رجال, ولد صغير, شايب بيقطع الشارع ومتوهق عند الإشارة «((مشهد كلاسيكي من الأثر)).

هل يعطف على الصغير ويعامله كنه ولده ولايضحك عليه وإذا راح هل يحش فيه ويصلخه وياكل لحمه؟
هل إذا شاف شخص كبير يحتاج مساعدة, ينقز من بينكم ويروح يساعده ولا يقول مالي دخل؟
هل إذا سألكم غريب عند الإشارة عن توصيف مكان معين يرد عليه بإحترام ويجاوبه بضمير أو إنه يزحلق والدي والديه ويسفره للنعيرية؟
او يمكن يجاوبه صح بس إذا سكر الدريشة قال يالبيييييييييه شفت القطع اللي معاه ؟ أو يقول لك وش ذالسبهة يالله فهم التوصيف!
هل تعامله مع البقالات والمحلات تعامل حلو وسمعته ممتازة ؟ ولا كل بقالات الديرة يطلبونه فلوس ولا يحبون يخدمونه لانه يسبهم ويلعنهم كل ماجا عندهم.

كيف تعامله مع العمال, الهنود, الفلبينيين, الأمريكان والأجانب بشكل عام.
هل هو فاهم إنهم ناس مثلهم مثله متغربين عن أهلهم من أجل حاجة, وإنها كلها مجرد سنة سنتين أو عدة سنين ويصير هو بنفس موقفهم, يفحط بين الشركات بشهادته ولا يطلع له وظيفة؟
ويصيرون هم أحسن منه, لقوا وظيفة بآخر الدنيا وسعوا لها وهو قاعد عند امه؟

تجربة شخصية عشتها معاه

سلف

كلنا نحتاج, أحيانا تحتاج ريال ريالين تاخذها من صديقك وتسميها سلف, موضوع بسيط ماله داعي الواحد يقول رجع الريالين, مع إن من باب الوقاحة والصداقة أحياناً تقدر تزلع لصديقك وتقول له انا كنت أطلبك ريالين, حاسب عني هالمرة.

لكن لما يكون محتاج بيوم من الأيام, وانت في تيك (تيك=مزيج بين تلك وذيك) اللحظة ربي منعم عليك ومنت في ضيق, المبلغ كبير شوي بالنسبة لك وله, ماهو مبلغ تقدر تطلعه خلال شهر مثلاً, وتساعده بكل رحابة صدر.

لما يجي الموعد, طبيعي إنك ماراح تفكر إنه لازم أجيب فلوسي من فلان, خويك أكيد ويمكن ناسي او عنده ظروف.

مع العلم بأنه مفروض ماينسى, ومفروض هو يكون أحرص منك عالتسديد علشان يريح نفسه ويشيل هم من على صدره ف مفروض لو ماكان عنده, يبلغك قبلها بيوم “والله يا فلان ترا موعدنا بكرة لكن لو تسمح لي شوي” وأكيد إنت يالطيب الحبيب بتوافق, الموضوع كله من اوله لاخره اخلاق الله يلعن ابوها اخلاق هههههههههههه ((واضح إني زعلان؟)).

هذي بعض المواقف وتقدر تقيم زي ماقلنا بالأمور الصغيرة الريال والريالين, إذا كان حريص عليها ويردها ويتذكرها بنفسه, تدري إنه إنسان ممكن تعطيه تقييم حلو في الأمور الكبيرة.

موعد

“والله راحت علي نومة يارجال لا تصير زلع عاد” جمل نسمعها دايم من أصحابنا لو تأخروا يوم ونص على موعد معين, فما بالك ب 10 دقايق أو 5 دقايق, لحظات أنت تحتاجه فيها يكون موجود عالوقت, ويسحب على دين اهل أهلك.

نتهاون بالعادة بهالأمور مع أصدقائنا, لكن يبي لك تقيمه من خلال الامور والمواعيد العادية علشان تعرف وقت الجد هل اقدر اعتمد عليه ولالا.

في النهاية

اللي ذكرته ماتوقع إنه الطريقة الوحيدة اللي ممكن تقيم فيها أصحابك, ولكن اتوقع إنها طريقة ممتازة تقدر تاخذ فيها علامات عن صديقك بين فترة والثانية.

ماتوقع إني أخبر إنسان بهالمواضيع, لكن هذي سالفة خونطرية كذا طرت على بالي وقلت أشخبط عنها شوي, طبعاً هي من كانت تحشيشة مستمرة تسير علي كل فترة والثانية وهالمرة قررت أكتب عنها.

أنتم وش رايكم بموضوع تقييم الأصدقاء؟