لما الـAI يجيب فيك العيد

أحيانا، تحاول تعتمد عالـAI عشان يساعدك بالمشاكل التقنية، حتى لو كنت فاهم، إلا مايطلع لك شي انت ماتفهم فيه كثير، أو إن الإي آي اجوبته مقنعة بس تجيب فيك العيد. هذي خلاصة وحدة من تجاربي قلت اشارككم اياها، لا تضيع فلوس ووقت، أحيانا الطرق القديمة أحسن مليون مرة

 

🔌 ليش أصلاً جبت UPS

حبيت أكمل السيت أب حقي بجهاز UPS عشان لو طفت الكهرباء ما يطفي الكمبيوتر. السبب إن أحياناً أشغّل عليه بوتات وأمور وأنا ما أكون حوله بالويكند، فما أبيه يطفى وأنا غايب.

موديل الـ UPS اللي جبته يلزمك تثبّت برنامج معيّن عشان المراقبة والإعدادات. ثبّته، اكتمل التركيب، وشغّلت الكمبيوتر على طول. المشكلة إن التعليمات كانت تقول لازم تشحن البطارية أربع ساعات على الأقل قبل الاستخدام — وأنا ما راعيت.

وقعد الجهاز يطلع أصوات طول الوقت. ظنيت إن البطارية فاضية وهو يعطيني تحذيرات، وما طقيت له خبر.

 

💥 اللي صار بعدين

فجأة وأنا ألعب لعبة، طفى الكمبيوتر كله. كأن الـ UPS انتحر وسبّني معاه.

لما فصلت الـ UPS وشغّلت الجهاز من التيار العادي، اشتغل. لكن الـ resolution صارت واطية جداً. المعالج حقّي ما فيه integrated GPU، والشاشات كلها كانت شغّالة على كرت الشاشة، فمنطقياً المشكلة إما الكرت وإما شي متعلق فيه.

 

🤖 رحلة الـ troubleshooting مع ChatGPT

حاولت أسوي troubleshooting مع ChatGPT. من البداية استبعد إن المشكلة من الكرت أو المذربرد، بحجة إن فيهم حماية من الشورتات الكهربائية. فبدأ يمررني خطوات: أعدّ تثبيت درايفر الشاشة، بعدين امسح الدرايفر للصفر وثبّته من جديد، بعدين غيّر إعدادات بالبايوص.

كلها ما نفعَت. في الآخر قال لي: أعتقد الكرت احترق، وبساعدك تسوي RMA.

 

⏳ الشركة والانتظار والبديل اللي ما طلع

أرسلت للشركة، سووا تحقيق، قالوا: جيب الكرت. رحت وديّته وقلت يبدّلونه لي على طول. قالوا: الشغلة بتأخذ من أسبوع لاثنين. حاولت أطلب منهم كرت بديل مؤقت، أي شي — ما ضبط الوضع.

طلعت من عندهم وما أني قادر أتحمّل أقعد بدون كمبيوتر أسبوعين. فقررت أشتري كرت شاشة جديد (5070 Ti) وباور سبلاي معه، لأني صرت شاكّ في الباور بعد أو إن القديم ما راح يتحمّل الكرت الجديد.

شبّكت كل شي. والمشكلة لسى موجودة.

 

🔄 رجعة لشات جي بي تي

رجعت لشات جي بي تي. قال: آسف، يمكن المشكلة من السي بي يو. قلت له: لا تستهبل، أنت الحين كلفتني كرت شاشة وباور سبلاي، ومرة وحدة تقول لي يمكن السي بي يو؟ قال: يمكن الرام، جرّب افصلها وشيك. جرّبت، وفعلاً فصلت وشيكت — مع إنه ما له علاقة منطقية — ولا ضبطت.

قفلت معاه من ناحية التشخيص ورجعت أبحث يدوي بقوقل. قد بحثت قبل كذا وما كان فيه حل واضح، لين بالغلط وقعت على تعليق بأحد المنتديات: واحد ذكر اسم برنامج الـ UPS نفسه اللي عندي وقال: امسح البرنامج ويضبط.

أخذت وقفة. قلت يمكن يضبط وأنا أصلاً مقهور من اللي صار. مسحت البرنامج، عملت ريستارت — وكل شي رجع يشتغل تمام.

 

💸 طيب والفلوس والكرت؟

الكرت القديم اللي “احترق” حسب تشخيص الـ AI، الحين عند الشركة يصلحونه. والكرت الجديد والباور الجديد اللي اشتريتهم، صاروا معاي زيادة — أو على الأقل تجربة غالية تعلمت منها إن الـ AI يقدر يورّطك ويستبعد أشياء غلط ويوصلك لخطوات تكلفك فلوس ووقت.

ما خليتها بخاطري. رحت لشات جي بي تي مرّة ثانية عشان اهزءه وقلت له يا غبي، مستسهل الأمور؟ ومو لأنه AI معناه نسمح لك تلعب بحياة الناس ووقتهم وفلوسهم يمين يسار. وما قصر: اشتغل معاي كدكتور نفسي، تحملني وسمع كلامي وخلاني أفضفض، وفي الآخر طلعت منه وأنا أضحك وأنا مبتسم. 😊

 

💡 الخلاصة

الخلاصة اللي أخذتها: الـ AI مرّة يفيد ومرّة يضلّل. لو عندك مشكلة لا تعتمد عليه لحاله، دور في المنتديات واقرأ تجارب الناس اللي عندهم نفس موضوعك وخذ رأي احد مجرب قبل ما تروح تتكلف و تشتري قطع جديدة أو تسلّم نفسك لقرار “الكرت احترق” أو “غيّر السي بي يو” من غير تأكيد.

وبس.