Visual Studio Code

ياخي كنت في ضلال مع أنواع مختلفة من الـ IDEs الفترة الماضية

• Sublime والله مادري ليش ركبته كان فترة تجربة قديمة وعدت حمدلله
• Notepad++ كان العشق لمدة ماهي بسيطة من الزمن, تعديل ملفات والوان وحركات
• Atom.io حبيته لانه كان منتج من قت هب وكان يغطي كل إحتياجاتي وفيه دارك-مود وتجديد يعتبر من نوت باد++

ويطلع لك VS Code من مايكروسوفت، وأمانةً ذيك الفترة كنت توني طايح باللينكسات والأوبن سورس وقاعد اقول وش الله يحدني اقعد احشر عمري بالشغلات التجارية وكذا وكنت مقروص من مايكروسوفت فجول ستديو كيف إنه حجمه كبيييييييييعععععععععععععر ويالله يالله تركب الأشياء اللي تحتاجها فسحبت على فجول ستديو كود فترة واللي زاد الطين بلة وخلاني اسحب عليه، سالفة الكوماند تاب اللي فوق هذا اللي مادري كيف اطلعه ومدري وش فايدة امه ولازم تدخله اذا بغيت تسوي اي شي في الإعدادات انا مادري هو كان الخيار الوحيد وقتها ولا كان فيه قائمة وماكنت أدلها ولا هم ضافوها بعدين ولا شسالفة المهم اني سحبت عليه

وحبة بعد حبة صرت اشوف الناس دروسها بيوتيوب كلهم مرتبين والوان ومناسبة ماكان يعوق معاي صراحة كنت اطبق الدروس بالأتوم وماشية اموري

طحت في تويتش وفي شلة الأنس مازن ومشاري ومطلق وبو دهنين وووو وقعدت اتابع ناس بتويتش ومسكت غلط كنت توني شاري جهاز جديد واركب في إس كود جنب الأتوم قلت يالله خل اجرب واذا تعطلت بوقف استخدامه واسحب عليه والأتوم عندي وماعاقت معاي الحمدلله من يومها وإلى اليوم وانا استخدم في إس كود

ربطته مع GitHub Desktop وماشية الأمور سموووث ووين ماتتوقعه تلقاه التغيير احيانا حلو واحيانا نكبة لكن هذا طلع شي كويس

حالياً استخدمه لكتابة هذي التدوينة، ومركب الإضافات التالية:

• Auto Close Tag عشان لما اسوي صفحات ويب, وافتح تاق, يكتب هو تاق التسكيرة أوتوماتك
• Beautify / Prettier صراحة مفروض واحد منهم, وبريتير اعتقد احسن بكثير, بيوتيفاي كان قديم على ما أظن
• C/C++ ايه ماقلت لكم؟ بديت اتعلم سي هههههههه الأمور سهلة في الفي إس كود, ترمنل جنبك كومبايلر عندك كودك تحت إبطك وأمورك سمبتيك ف ليش لا
• Code Runner يعتبر كومبايلر حق لغات برمجة كثير من ضمنها سي والجافاوع
• Docker ههههههه هذا اللي كنت ماني فاهم ليش، يبي لي اكتب عنه تدوينه بلحاله
• ESLint واللينترز بشكل عام, كنت اشوفها ولا ادري وش هي, هي بالعربي إضافات تحطها على الأتوم أو الفي إس كود، تعطيك خطوط حمراء في الكود تحت الكلام, زي التصحيح الإملائي تحاول تعطيك إقتراحات بحيث تتبع convention معين في كتابة اكوادك
• Python وهذي بعد لغة تعلمتها وانا عالفي إس كود
• Vetur لاتسألني إذا مالك علاقة بال VueJS
• YAML يساعدك تكتب أكواد يامل بطريقة صحيحة

هذي المهمين اتمنى جازت لكم السالفة وإذا ماجربت في إس كود جرب, دف عمرك عليه ويمكن يجوز لك