Gravatar | تبي صورتك تطلع بالمدونات وانت ترد؟

اليوم طايح لكم على موقع, الله يخسهم الأجانب مسوينه وطايحين فيه من زماان وحنا طبعاً مايهمنا غير فيسبوك ونتلوق ويوتيوب.
الموقع طبعاً طلع مع طلعة الـ Web 2 , < إذا ما تعرفون وشهو عادي كملوا, أنا نص كلامي ماينفهم أصلاً بس أقوله anyway.

ودك ترد بالمدونات وتسولف وتعلق مع الناس ولا ودك تبتلش وكل مرة تسوي لك بروفايل بكل مدونة؟
أغلب المدونات تقبل التعليقات من الزوار, الحين المشكلة أنت زائر, كيف تطلع صورتك؟

نظام المدونات, لما تكتب إسمك في التعليق وإيميلك,
يروح أول شي يبحث في موقع إسمه Gravatar.com عن صورة للشخص صاحب الإيميل الفلاني.
هل فلان مسجل عندكم ؟ إذا لا , مايحط لك صورة
إذا إيه, يجيب صورتك ويحطها بالمدونة مع ردك

سجلوا بالموقع هذا,
بيقول أضف إيميلك , لما تضيفه تحتاج تفعله, تجيك رسالة على إيميلك للتأكيد أكد الإيميل,
وتقدر تضيف إيميل ثاني, بنفس الحساب مايحتاج تسجل حساب جديد ضيف إيميلاتك كلها بحيث إنه وين مارحت أي إيميل تحطه, بتطلع صورتك مع الرد وتقدر ترفع صور مختلفة وتحط لكل إيميل صورة وانت ماشي.

أتمنى إن هالمعلومة تفيد أحد بيوم من الأيام

ويالله برا انت وياه دوروا لكم مدونة ثانية وفرفرة إنترنتية ممتعة